SEPI Valoriza Emelita nia Luta

Promove igualdade jeneru no advokasia direitus labarik feto, liliu labarik feto nebe kaben no hetan oan ho idade ki’ik, sai hanesan esforsu nebe’e Emelita da Cruz hala’o iha nia servisu nudar empregador sosiadade sivil. Esforsu hirak ne’e halo Jerente Programa Plan iha Distritu Aileu hetan apresiasaun husi Secretaria Estadu ba Promosaun Igualdade (SEPI) iha selebrasaun loron nasional feto iha Dili Convention Center iha Sesta liu ba (8/11/2013).

Promove igualdade jeneru ne’e, hatudu husi Emelita liu husi servisu ho viajem do’ok kada lor-loron ba mai Dili-Aileu. “Durante ne’e hau sempre halo servisu ho viajen do’ok, Aileu-Dili ba mai,  maibe hau la nota katak ne parte ida husi igualdade jeneru, katak feto mos bele halo servisu hanesan mane hodi servisu ho distansia do’ok,” katak Emelita.

Maske servisu ho distansia do’ok no perkupado tebes, la halo Inan ho oan nain 4 ne’e abandona nia oan, liliu oan nebe sei bebe. Intensaun hakarak tau matan tomak ba nia oan, halo Emelita talves tengki lori nia oan bebe ba servisu fatin “hau nia oan sei persija inan nia susuben ekslusiva antes nia halo fulan neen, entaun hau tengki lori nia tuir ho hau, maske hau lao ba servisu do’ok” katak Emelita.

Ekspresa igualdade jeneru hatudu mos husi Emelita wainhira nia involve a’an iha membru jestaun Plan nia hodi foti desijaun iha organizasaun Plan, “laos mane deit mak bele foti desijaun, maibe feto mos bele atu foti desijaun” Emelita aumenta.

Alende promove igualdade jeneru, Emelita mos hetan apresiasaun husi SEPI ba nia servisu halo advokasia no promove direitus labarik feto wainhira servisu hamutuk ho ONG Plan, organizasaun nebe tau matan ba direitus labarik “iha ONG Plan hau aprende barak kona ba saida mak jeneru, no husi teoria nebe hau hetan, hau koko hodi liga ba hau nia servisu lor-loron” katak Emelita.

Laos deit fo atensaun ba direitus labarik feto no promove igualdade jeneru, Emelita mos halo esforsu  hodi tau matan ba maluk kbi’it laek sira. Emelita ho apoio tomak husi nia kaben Gonsalo buka fundus ba konstruksaun uma permanente ba familia veteranus ida iha Aileu.