Hasa’e konxiénsia mundu internasionál nian kona ba direitu labarik Timor-Leste sai hanesan pontu diskusaun ne’ebé hala’o husi Koaligasaun Direitus Labarik ne’ebé hala’o iha loron Kinta, 12 de Dezembru. Diskusaun ne’e fasilita no hetan suporta fundus husi Plan International Timor-Leste, no marka prezensa husi organizasaun sosiedade sivíl ne’ebé servisu kona ba direitus labarik Timor. Koaligasaun sira mós prepara esbosu relatóriu kona ba konvensaun Direitus Labarik ne’ebé sei submete ba Geneva iha Marsu 2014.
Relatóriu ne’e foka liu ba oinsá hadi’a direitus labarik hodi asesu ba edukasaun, saúde no justisa juvenile and identifika mós progresu no dezavius ne’ebé labarik sira hasoru ba sira nia direitus iha Timor-Leste. Problema hirak ne’e identifika hanesan areas prioridade ne’ebé labarik sira seidauk hetan. “Alende aprezenta progresu no dezavius, ami mós aprezenta rekomendasaun hodi hadi’a” katak Joao Pequeno, reprezentante koaligasaun ne’ebé sei aprezenta relatóriu iha Geneva.
Durante workshop, partisipantes sira fahe ba grupu hodi reve’e no halo amandementus ba esbosu relatóriu, ne’ebé hakerek liu husi konsultasaun ho Inan-Aman, Mestre sira no lideransa komunidade.
Timor-Leste ratifika ona Konvensaun Direitus Labarik iha tinan 2003 no relatóriu ba tinan ida ne’e hanesan segundu relatóriu ne’ebé sei submete ba Nasoens Unidu no inklui relata kona ba protesaun labarik ne’ebé sai hanesan prioridade.
No comments:
Post a Comment